MOMIN KAY HAR MAMLE ME KHAIR HAI:
- Oct 25, 2017
- 1 min read
Hazrat Suhaib Radhi ALLAH Anhu se riwayt hai ke Nabi Kreem Sallallahu Alaihi Wasallam ne farmaya, "Momin ka maamla bhi khoob hai, uska har haal hi behtar hota hai, aur yeh baat momin ke alawa kisi ko naseeb nahi hoti. Agar khushi naseeb ho to shukr guzaar hota hai aur yeh uske liye behtar hai, aur agar takleef pahuche to sabr karta hai aur yeh bhi uske liye behtar hai."
Sahih Muslim h (2999)
NOTE
* Hadis se malum hua ke ek momin taqdeer e ilaahi par mukammal eimaan rakhta hai. Kisi muraad ke pura hone par ya kisi khushi ke waqt woh apni zaat par ghamand karke nashukra nahi ban jata balke ALLAH ka shukr ada karta hai kyuke ALLAH ke fazl se hi muraade puri hoti hain aur Woh hi zaat har chiz par Qaadir hai. ALLAH ki taqdeer par use itminaan hota hai aur musibat ke waqt me use beqarari lahaq nahi hoti kyuke usko itminaan hota hai ke yeh sab ALLAH ki taqdeer se ho raha hai jo aasmano aur zameen ka Baadshaah hai aur Uska likha hokar rahta hai. Aur dil ka yeh sukoon aur beqarari se nijaat sirf momin ko hi haasil hoti hai, kamzor eimaan walo ko nahi. Is liye ek momin ko har haal me behtari haasil hoti hai. ALLAH hum sab ko apne momin bandon me shaamil karke apni rahmato se nawaze. Aameen !
Comments